خدا گنجے کو ناخن نہ دے

جس طرح سائیکل چلانے والے کو پجارو پر بٹھا دیں تو وہ لازمی کسی دیوار سے دے مارے گا۔بالکل اسی طرح ایک غریب یا درمیانے درجے کے شخص کو اگر بے تحاشہ دولت مل جائے تو اسے سنبھالنا اور ٹھیک سے استعمال کرنا انتہائی مشکل ہے۔ عدالت کے نوٹس میں لانے کے لیے آج ایک ایسے شخص کی روداد لکھی جا رہی ہے جو چند ماہ میں جھونپڑی سے فائیو سٹار ہوٹل میں آگیا۔اپنی سوچوں میں اس نے نجانے کتنے ہیرے تراشے،کتنے تاج محل بنائے اورنہ جانے کتنے خواب بنے لیکن دولت کی دیوی نے چند ماہ میں ہی اسے طلاق دے دی۔اور ایک بار پھر سے وہ انہی ٹوٹی پھوٹی،کچی پکی سڑکوں پر جوتے گھسائیگا جہاں سے وہ ایک دم امیر آدمی بن گیا تھا۔
ضلع ساہیوال کے گاؤں 101/12_L کسووال میں عبدالحمید ارائیں رہتا تھا۔خراب مالی حالات کی وجہ سے کوئی خاص کاروبارنہیں تھا بلکہ اسکے گھر والے لوگوں کے کھیتوں میں کام کاج سے رزق حلال کماتے جب کہ وہ خودفورڈ گاڑی چلاتا تھا۔کچھ عرصہ پہلے اس نے لاہور میں کسی کوٹھی میں ملازمت کرلی۔جہا ں ڈرائیونگ کے ساتھ ساتھ وہ گھر کے کام کاج بھی کرتا تھا۔پچھلے چند ماہ سے اسکے مالی حالات یک دم بدلنے لگے۔اسکے چال چلن اور سوٹ بوٹ سے دولت کی بو آنے لگی۔گاؤں والا پرانا گھر گرا کر نیا بنوایا جس پر اچھی خاصی رقم خرچ کی۔گاؤں میں چونکہ ہر شخص ایک دوسرے کو ا چھی طرح جانتا ہے۔اس لیے گاؤں میں چہ مگوئیاں شروع ہو گئی۔ ہر کوئی قیاس آرائی کر رہا تھا کہ یہ بندہ اپنی مالکن سے فراڈ کرتا ہے یا چوری کرتا ہے یا اس نے کسی امیر سے شادی کر لی ہے۔حالانکہ سب جانتے بھی تھے کہ اس لڑکے کا ماضی بے داغ ہے۔ ابھی چند ماہ پہلے عبدالحمید صاحب نے نئے ماڈل کی سیلون کار لی اور ساتھ ہی گاؤں میں ٹھیکے پر چند ایکڑ زمین بھی لی۔(ٹھیکے سے مراد ایک سال کے لیے کسی کی زمین پرکاشت کرنا اور اس کے بدلے میں ایک سال کا طے شدہ معاوضہ ادا کرنا۔)اگرچہ ان تبدیلیوں نے اسے میدا آرائیں سے چوہدری عبدالحمید بنا دیا لیکن سیلون کو دیکھ دیکھ کر لوگوں کو ا ورزیادہ گدگدی ہونے لگی اور انکی آنکھوں میں شکوک کے ڈورے اور بھی واضح ہونے لگے۔اور آخر تین ماہ پہلے پولیس نے اسے حراست میں لے لیا۔سب سوچ رہے تھے کہ شاید گاؤں کے کسی شخص نے پولیس سے اپنے شکوک کا اظہارکیا ہے۔لیکن پولیس کو درحقیقت شہر کے ایک سنیار (گولڈ سمتھ) نے بتایا تھا کہ یہ شخص سونے کی اینٹ بیچ کر گیا ہے۔ اصل میں پولیس نے تمام جیولرز کو ہدایت کی تھی کہ اگر کوئی شخص سونا یا کوئی جیولری بیچتا ہے تو فورا پولیس کو آگاہ کیا جائے۔کیونکہ انہی دنوں چیچہ وطنی میں ایک بہت بڑی بنک ڈکیتی ہوئی تھی اور چور بنک کی الماریاں تک اکھاڑ کر لے گئے تھے۔
تھانے میں پہنچتے ہی پولیس نے اپنا روپ دکھانا شروع کیا اور چند منٹ بعد ہی عبدالحمید نے بتایا کہ میں نے کوئی چوری یا فراڈ نہیں کیا ۔یہ سب مجھے میری قسمت سے ملا ہے۔اس نے بتایا کہ وہ ایک مرحوم جنرل کے گھر ملازمت کرتا ہے۔جنرل مرحوم کی بیوہ نہایت سلیقہ شعار اور سخاوت پسند عورت ہے۔وہ تنخواہ کے علاوہ بھی اسکی مالی اعانت کرتی رہتی ہے۔ آج سے چوبیس سال پہلے جنرل صاحب ، سابق صدر پاکستان جنرل ضیاء الحق ،جنرل محمد حسین،جنرل اختر عبدالرحمن او ردیگر جرنل کے ساتھ اپنے وطن واپس آرہے تھے تو طیارہ فضا میں حادثے کا شکار ہو گیا۔اور تمام افراد اپنے خالق حقیقی سے جا ملے۔جنرل مرحوم نے آنے سے تین دن پہلے اپنی بیگم کو فون کر کے کہا کہ میں ایک بہت قیمتی تحفہ تمہارے لیے کارگو کر رہا ہوں لیکن تحفہ سے پہلے انکا جسد خاکی گھر پہنچ گیا۔بحرحال کچھ دن بعد کچھ سامان پہنچا جس میں ایک خوبسورت صوفہ سیٹ بھی تھا لیکن اس بیوہ عورت کے لیے اب یہ اشیاء اتنی اہمیت کی حامل نہ تھی۔وقت گزرنے ک ساتھ صوفہ پرانا ہو کر جگہ جگہ سے پھٹ گیا تھا۔بیگم صاحبہ نے کہا کہ حمید یہ صوفہ تم لے لو اسکی پوشنگ وغیرہ کروا کے اپنے کمرے میں رکھ لینا۔اپنے کمرے میں جب پوشنگ تبدیل کرنے کے لیے صوفہ کا کپڑا تارا تو اندر سے سونے کی اینٹیں جنکی تعداد س تھی۔ چونکہ مالکان بھی اس سے لا علم تھے ۔اس لیے یہ کوئی چوری نہیں ہے۔ قسمت کا کھیل ہے۔لیکن پولیس نے حسب روایت اسکی اچھی خاصی دھلائی کے بعد اسے جیل بھیج دیا۔اور اسکی گاڑی کے ساتھ ساتھ اس کی زمین بھی قبضہ میں لے لی۔حالانکہ بیگم صاحبہ نے تصدیق بھی کر دی کہ اس نے عبدالحمید کو صوفہ دیا ہے اور یہ کہ جنرل صاحب نے کسی قیمتی تحفے کا ذکر کیا تھا۔لیکن انکی وفات کے بعد یہ بات اسکے ذہن سے نکل گئی۔
اگرچہ عبدالحمید نے اخلاقی لحاظ سے غلط کام کیا ہے اور اسے ہر گز اخلاقی اقدار کو پامال نہیں کرنا چاہیے تھا۔لیکن اس کے باوجود یہ کسی بھی لحاظ سے چوری نہیں ہے۔کیونکہ سونے کے مالکان خود بھی اس راز سے نا آشنا تھے کہ چوبیس سال سے انکے پاس اتنا سونا موجود ہے۔اور صوفہ بھی عبدالحمید کو دیا گیااس سے اخلا قی جرم ضرورسرزد ہوا لیکن یہ کسی طور بھی چوری کے زمرے میں نہیں آتا۔اس لیے پولیس نے اسے بری طرح زودکوب کر کے زیادتی کی ہے۔دوسرا اسکی زمین پر قبضہ بھی غلط ہے اور اہم بات یہ کہ اس سونے اور کار کیا ہوا۔کیونکہ وہ لواحقین تک نہیں پہنچا۔عدالت کوچاہیے کہ وہ اس سلسلے میں ٹھوس معلومات حاصل کرکے مال مالکان تک پہنچائے اور عبدالحمید کو کم از کم رہائی دے۔مالکان کو بھی عبدالحمید سے نرم رویہ اختیار کرنا چاہئے کیونکہ اسی کی وجہ سے یہ سب انکو ملے گا۔ورنہ تو وہ بے خبر تھے۔بلکہ اعلی ظرفی تو یہ ہے کہ کچھ حصہ اسے بھی دیں۔او ر عبدالحمید صاحب کو پولیس کی مہمان نوازی اور علاقہ میں ہونے والی رسوائی کے پیش نظر آئندہ یہ بات یاد رکھنی چاہیے کہ ایمانداری بہترین حکمت عملی ہے۔