عوام دو وقت کی روٹی کو ترس رہے ہیں، شہبازشریف

لاہور(پاک نیوز) شہباز شریف کا کہنا ہےکہ حکمرانوں کو معیشت اور عوام کی تکالیف کا کوئی علم ہے۔تفصیلات کے مطابق مسلم لیگ ن کے صدراور قومی اسمبلی میں اپوزیشن لیڈر شہباز شریف  کی جانب سے جاری کردہ بیان  میں کہا گیا ہےکہ عوام بھوکے اور بے روزگار ہیں، حکمران سب اچھا ہے کی بے حسی کی رپورٹ دے رہے ہیں ،عوام دو وقت کی روٹی کو ترس رہے ہیں۔انہوں نے کہاکہ آج ملک کو اشیاء ضروریہ کی قیمتوں میں اضافے کے بحران کا سامنا ہے،عوام کو آٹا، گندم، چینی، سبزیاں، خوردنی تیل، مرغی، دودھ، انڈے، ادویات اور دیگر اشیائے ضروریہ کی قلت کا سامنا ہے، اشیائے ضروریہ کی قیمتیں عوام کی پہنچ سے باہر ہوچکی ہیں، حکمرانوں کے روز کرپشن اسکینڈلز آئیں گے تو عوام کی روٹی روزانہ مہنگی ہی ہوگی۔مسلم لیگ ن کے صدر نے کہاکہ آٹے کی قیمت میں 57 روپے فی کلو اضافہ ہوا ، یہ 73 فیصد اضافہ ہے،چینی کی قیمت 120 اور 130 تک گئی ہے، 100روپے یا 85 فیصد اضافہ چینی کی قیمتوں میں ہوا، دودھ کی قیمت میں 31 فیصد اضافہ ہوا، دودھ فی لیٹر 108 روپے یا اس سے زائد قیمت پر فروخت ہورہا ہے۔ اپوزیشن لیڈر نے کہاکہ عوام کی بنیادی ضرورت کی یہ اشیاءانتہائی مہنگے داموں فروخت ہورہی ہیں ، اضافی گندم پیدا کرنے والے ملک میں آٹے کی فراہمی کو جو حکومت یقینی نہ بناسکے، اس کی کرپشن اور نااہلی کا اس سے بڑا ثبوت اور کیا ہوسکتا ہے؟