راولپنڈی(پاک نیوز) سینئر سول جج غلام اکبر نے وفاقی وزیرِ داخلہ رانا ثناءاللہ کو فوری طور پر گرفتار کر کے پیش کرنے کا حکم دے دیا۔ وارنٹس لیکر اینٹی کرپشن پنجاب کی ٹیم رانا ثناءاللہ کی فوری گرفتاری کے عدالتی حکم کی تعمیل کیلئے اسلام آباد چلی گئی۔دوران سماعت عدالت نے استفسار کیا کہ ابھی وارنٹ گرفتاری جاری ہوئے، ایک دم اشتہاری کیسے قرار دیں۔ جج نے ریمارکس دیے کہ دوبارہ اسلام آباد جاؤ، ملزم کو گرفتار کر کے عدالت پیش کرو۔ سینئر سول جج غلام اکبر نے دوبارہ وارنٹ گرفتاری جاری کر دیے۔سماعت کے دوران تفتیشی ٹیم نے درخواست کی کہ ملزم چھپ رہا ہے، گرفتاری کی کوشش کی، اب اشتہاری ڈکلئیر کیا جائے، جس پر عدالت نے دوبارہ اسلام آباد جا کر گرفتاری کا حکم دے دیا۔ واضح رہے کہ رانا ثنا اللہ کے خلاف مقدمہ اینٹی کرپشن نے کلر کہار میں مبینہ اراضی فراڈ میں درج کیا تھا۔
