اسلام آباد(ڈیسک نیوز) مرحوم صحافی ارشد شریف کا جسد خاکی غیر ملکی پرواز سے نیروبی سے دوحہ کے لیے روانہ کردیا گیا ہے، جہاں سے میت آج رات ایک بجے اسلام آباد پہنچے گی۔وفاقی وزیر مریم اورنگزیب نے اپنے ایک بیان میں کہا ہے کہ وزیر اعظم شہباز شریف کی کینیا کے صدر سے گفتگو کے نتیجے میں قانونی امور تیزی سے مکمل ہوئے، قانونی مراحل کی تکمیل کے بعد ارشد شریف کی میت کو اسلام آباد روانہ کیا گیا۔انہوں نے کہا کہ پاکستانی ہائی کمشنر سیدہ ثقلین نے کئی گھنٹے تمام مراحل کی نگرانی کی، وہ جسد خاکی روانہ کرنے تک نیروبی ائیرپورٹ پر موجود رہیں۔ ارشد شریف کا جسد خاکی لیے پرواز کیو آر 1342 نیروبی سے 3بج کر 14 منٹ پر روانہ ہوئی، میت آج شب پاکستان پہنچائی جائے گی۔تدفین جمعرات کو اسلام آباد میں ہو گی۔
