طالبان کے حملوں کی صلاحیت ختم کردی ہے، ترجمان پاک فوج

راولپنڈی(بیوروچیف)ترجمان پاک فوج کا کہنا ہے کہ طالبان شدت پسندوں کی پاکستان میں منظم حملے کرنے کی صلاحیت ختم کردی گئی ہے اور بکھرنے کے بعد اب وہ اکا دکا حملے کررہے ہیں، وزیرستان آپریشن سے شدت پسندوں کو بڑا دھچکا پہنچا، فوج سیاست میں ملوث نہیں، کسی فریق کی حمایت نہیں کررہے۔ برطانوی نشریاتی ادارے کو خصوصی انٹرویو میں پاک فوج کے ترجمان میجر جنرل عاصم سلیم باجوہ نے کہا ہے  کہ یہ تاثر درست نہیں ہے کہ شدت پسند دوبارہ سر اٹھا رہے ہیں، طالبان بکھر جانے کے بعد ادھر ادھر حملے کررہے ہیں، کبھی کوئٹہ، کبھی کراچی، منصوبہ بندی کے تحت بارود سے بھری گاڑیوں کے ذریعے ملک کے مختلف حصوں میں حملے کرنے کی طالبان صلاحیت ختم کردی۔فوج کے تعلقات عامہ کے شعبے کے سربراہ نے کہا کہ شمالی وزیرستان میں جاری آپریشن ضرب عضب نے شدت پسندوں کو بہت بڑا دھچکا پہنچایا، فوج شمالی وزیرستان میں اپنے اہداف حاصل کرتے ہوئے کامیابی کے ساتھ آگے بڑھ رہی ہے، تکمیل سے متعلق ڈیڈ لائن نہیں دی جاسکتی۔ایک سوال پر ان کا کہنا تھا کہ تحریکِ طالبان پاکستان کی دوسرے درجے کی قیادت ماری یا گرفتار ہوچکی، ملا فضل اللہ اور اس کی کابینہ کے دیگر ارکان افغانستان کے علاقے کنڑ میں بیٹھے ہیں، ہم نے افغان حکومت سے ان کی حوالگی پر کئی بار بات چیت کی ہے۔سیاسی معاملات میں مبینہ مداخلت کے بارے میں سوال پر عاصم باجوہ نے کہا کہ فوج سیاست میں ملوث نہیں، سیاسی مسئلہ سیاسی طریقے ہی سے حل کیا جانا چاہئے، فوج کسی ایک فریق کا ساتھ دینے کی متحمل نہیں ہوسکتی کیونکہ یہ پوری قوم کی فوج ہے، ہم نے نہ پہلے کسی ایک فریق کی حمایت کی ہے نہ آئندہ کریں گے